Wadan weblog 2

هله

03.08.2008 03:39

 

 

هله یاهو هله یاهو ووایه
هله میراته وسله وغورځوه
هله راځه هله پايڅې  بډوهه
هله ځولۍ نیسم مڼې څنډوهه
* * *
هله چې ورانه چوتره جوړه کړو
د کلا بر سر کې حجره جوړه کړو
هله ماشینه له اوږې کوزه کړه
چې ترې څپرې ته زینه جوړه کړو

* * *
هله جومات مو مناره نه لري
په کې ماشوم څونډی سپاره نه لري
هله میله د راکټ کور نه راوړه
ورانه دیره مو کټاره نه لري
* * *
راشه دا لس ګوتې کړو لس بزغلي
د زړه پر للمه چې باران ووري
که له آسمانه څاڅکي  نه پریوتل
اوبه به ورکړو اوښکې څاڅکي څاڅکي
* * *
د ټوپک ماته شپیلۍ وشرنګوه
د توت پر شنه څانګه یې ونڅوه
چې ښوونځي ته ترې ټالۍ جوړه کړو
هله ګولۍ د ټانګ راوځړوه
* * *